Cole Palmer fékk athyglisverða spurningu frá blaðamanni sem spurði enska landsliðsmanninn út í það af hverju hann væri alltaf svo rólegur á velli og virðist sýna litlar sem engar tilfinningar opinberlega.

Palmer er leikmaður Chelsea en hann er afskaplega rólegur innan vallar og einbeitir sér mest megnis að eigin leik og ekki því sem gengur á utan vallar eða í stúkunni.

Palmer viðurkennir að móðir hans vilji sjá meira frá honum í fjölmiðlum en á móti þá er sóknarmaðurinn alveg eins og pabbi sinn sem er einnig mjög róleg persóna og er ekki mikið í því að sýna tilfinningar.

,,Mamma mín er alltaf að segja við mig að ég ætti að vera líflegri, brosmildari og orkumeiri,“ sagði Palmer.

,,Ég og pabbi erum bara aðeins of slakir held ég. Pabbi segir mömmu að láta mig vera, að við séum eins, við erum bara eins og við erum.“

,,Hvenær varð ég síðast reiður? Ég veit það ekki, kannski þegar ég spilaði PlayStation. Ég er ekki vélmenni sem sýnir engar tilfinningar.“

,,Þegar myndavélarnar eru ekki á mér og ég er í símanum að tala við vini mína þá nýt ég lífsins. Ég er bara að vera ég sjálfur.“