Ruben Amorim, þjálfari Manchester United, viðurkennir að slök markaskorun Matheus Cunha hafi farið að setja pressu á brasilíska framherjann.

Cunha kom til United frá Wolves í sumar fyrir 62,5 milljónir punda en hefur aðeins skorað eitt mark, gegn Brighton í október.

Hann snýr aftur í hópinn fyrir leikinn gegn West Ham í kvöld eftir tveggja leikja fjarveru þar sem Joshua Zirkzee hefur leitt línuna.

Cunha hefur þó orðið fljótt vinsæll hjá stuðningsmönnum vegna leikstíls sem sumir líkja við Eric Cantona, en Amorim segir að markaleysið sé farið að trufla hann.

„Hann hefur fleiri gíra. Hann er hjá öðru félagi með aðra pressu. Hann var að eiga erfitt því hann var ekki að skora og hugsaði of mikið um tölurnar. En áhrifin sem hann hefur á liðið eru okkur mikilvægar,“ sagði Amorim.