Marcus Rashford gæti þurft að snúa óvænt aftur til Manchester United í sumar, þrátt fyrir draumaflutning til Barcelona í síðasta glugga.

Englendingurinn gekk til liðs við spænska stórliðið á láni og inniheldur samningurinn kauprétt upp á 26 milljónir punda.

Nú eru þó blikur á lofti um framtíð hans, aðeins nokkrum mánuðum eftir að hann yfirgaf Old Trafford.

Samkvæmt The Athletic er líklegasta niðurstaðan sú að Barcelona láti Rashford fara þegar lánssamningurinn rennur út, sem myndi þýða að hann þyrfti að snúa aftur til United og annað hvort finna sér nýtt félag eða sannfæra Ruben Amorim um að hann eigi framtíð í herbúðunum.

Það væri þungt högg fyrir Rashford, sem hefur lýst því yfir að hann vilji dvelja áfram hjá Barcelona. Hann hefur byrjað tímabilið vel með sex mörk og níu stoðsendingar í 18 leikjum, en Hansi Flick lítur enn ekki á hann sem sjálfgefinn byrjunarliðsmann.