Jón segir frá þessu í Blökastinu, þar sem hann fer yfir víðan völl. Þá barst það í tal þegar fólk hefur móðgast yfir gríni Jóns í gegnum tíðina en einn af þeim er faðir fyrrum landsliðsmannsins og knattspyrnuþjálfarans Helga Kolviðssonar.
Þetta var þegar Jón og Sigurjón fóru í liðinn „Smásálin“ þar sem Jón leikur hlustendur sem hringja inn og eru oftar en ekki heldur skrautlegir.
„Sigurjón sagði að það væri Smásál eftir 30 sekúndur. Ég hleyp fram og fer að fletta einhverjum blöðum. Þar er grein um knattspyrnumanninn Helga Kolviðsson. Ég vissi ekkert um þetta. Mér fannst bara fyndið að vera Kolviðsson,“ rifjar Jón upp.
„Svo tók Sigurjón inn fyrsta hlustanda og ég sagði: „Já góðan daginn, Kolviður heiti ég. Veistu ekki hver Helgi Kolviðsson er? Það er sonur minn. Ég kann að búa til fótboltastráka.“ Eitthvað svona bull.“
Jón segir svo að því næst hafi Sigurjón spurt hann hvernig maður færi að því að búa til svona öfluga fótboltastráka.
„Maður gefur honum pylsur. Þegar hann var lítill strákur fékk hann ekkert nema pylsur,“ rifjar Jón upp að hafa sagt.
Það urðu þó eftirmál í kjölfarið á þessu gríni.
„Pabbi hans (Helga Kolviðssonar) var að hlusta á þetta og varð svona ofboðslega reiður af því við værum að hæðast að honum og nafninu hans. Þarna þurfti að biðja afsökunar en það var auðvitað enginn illur ásetningur,“ segir Jón, léttur í bragði.
Helgi Kolviðsson spilaði alls 30 A-landsleiki fyrir Íslands hönd á sínum tíma. Hann varð síðar aðstoðarþjálfari liðsins og fór til að mynda með því á HM í Rússlandi 2018. Einnig hefur hann þjálfað landslið Liechtenstein.
