Lionel Messi segir að hann sjái eftir einu sem átti sér stað á Heimsmeistaramótinu í Katar fyrir áramót.
Eins og flestir vita urðu Messi og félagar í argentíska landsliðinu heimsmeistarar eftir sigur á Frökkum í úrslitaleik mótsins.
Messi sér eftir einu sem átti sér stað í leik gegn Hollandi í 8-liða úrslitum. Mikill hiti var í leiknum og fagnaði Messi til að mynda fyrir framan Louis van Gaal, þjálfara Hollands, eftir leik.
„Mér líkar ekki það sem ég gerði og það sem gerðist eftir á,“ segir Messi.
Hann segir tilfinningarnar hafa tekið yfir.
„Það er mikil spenna, mikið stress. Fólk bregst við eins og það gerir og það var ekkert planað, þetta gerðist bara.
Ég er ekki ánægður með að hafa sýnt á mér þessar hliðar en svona hlutir gerast.“
