Reiðir argentískir stuðningsmenn hafa kallað eftir því að sóknarmaðurinn Julian Alvarez hætti með kærustu sinni eftir atvik sem kom upp í fögnuði landsliðsins eftir sigur á Heimsmeistaramótinu í Katar.

Alvarez, sem er leikmaður Manchester City á Englandi, var hluti af argentíska landsliðinu sem varð heimsmeistari eftir dramatískan sigur í úrslitaleik gegn Frökkum.

Það var fagnað vel og lengi eftir sigurinn, fyrst í Katar og svo heima í Argentínu.

Það var einmitt þar sem kærasta Alvarez, Maria Emilia Ferrero, sást koma kappanum undan því að taka myndir af sér með ungum argentískum stuðningsmönnum.

Þetta hefur vakið reiði og hefur undirskriftarlisti verið stofnaður þar sem þess er krafist að Alvarez segi Ferrero upp.

Yfir 20 þúsund manns hafa skrifað undir.

Það er ljóst að Alvarez mun þó ekkert mark taka á þessu.