Það hefur verið sagt í fréttum undanfarið að Paris Saint-Germain sé tilbúið að losa sig við brasilísku stórstjörnu sína, Neymar, komi nógu gott tilboð á þeirra borð.

Neymar hefur til að mynda verið orðaður við Chelsea. Þar er hans fyrrum liðsfélagi hjá PSG og samlandi, Thiago Silva.

„Hann verður að koma í Chelsea ef hann yfirgefur PSG,“ sagði miðvörðurinn.

Silva hrósaði Neymar í hástert. „Við þurfum ekki einu sinni að tala um hæfileika Neymar og fyrir utan það er hann frábær vinur.“

„Ég vona að þetta sé ekki bara í fréttum og að þetta muni í alvöru gerast, en ég veit samt ekkert um það,“ sagði Silva að lokum.

Neymar gekk í raðir PSG frá Barcelona árið 2017 fyrir 200 milljónir punda. Ætlunarverk eigenda félagsins með því að fá hann var að vinna Meistaradeild Evrópu en það hefur ekki tekist.