„Staðan er góð, við þurftum að kveðja Willum í gær. Hann er búin að vera í basli með hásinina, það voru ekki batamerki þar. Þeir sem fengu spörk eða krampa úti á móti Ísrael, voru að taka síðustu test í dag og það leit vel út. Það eru allir 25 leikmennirnir í hópnum á morgun leikfærir,“ sagði Arnar Þór Viðarsson landsliðsþjálfari fyrir leikinn við Albaníu á morgun.
Ísland tekur á móti Albaníu á Laugardalsvelli klukkan 18:45 á morgun í Þjóðadeildinni. Liðið gerði jafntefli við Ísrael í fyrsta leik.
„Við viljum tengja við frammistöðuna á fimmtudaginn, leikurinn á morgun er mikilvægt skref í okkar þróun. Það að tengja saman frammistöður er tákn um þroska og reynslu. Það er það helsta sem við erum að einbeita okkur að,“ sagði Arnar.
Guðjón Guðmundsson frá Stöð2 spurði Arnar út í þá gagnrýni sem liðið og hann hefur fengið undanfarið.
„Þetta er opin spurning, ef þú gagnrýnir mig fyrir eitthvað þá get ég svarað. Eina sem ég get sagt, ég þarf að vinna vinnuna mína. Ég svara ekki svona opinni spurningu.“
Arnar á von á því að gera breytingar á byrjunarliðinu á morgun. „Það verða einhverjar breytingar,“ sagði Arnar.