Íslenski landsliðsmaðurinn Guðlaugur Victor Pálsson fékk að líta rauða spjaldið er Schalke tapaði gegn Karlsruher á heimavelli í þýsku b-deildinni í kvöld.
Guðlaugur Victor hefur verið fyrirliði Schalke á tímabilinu í stað Danny Latza, aðalfyrirliða liðsins, sem hefur verið fjarri góðu gamni vegna meiðsla.
Kyoung-Rok Choi náði forystunni fyrir Karlruher strax á fyrstu mínútu leiks. Simon Toredde jafnaði metin á 15. mínútu og staðan 1-1 í hálfleik. Guðlaugur Victor var svo rekinn af velli á 72. mínútu þegar hann keyrði aftan í leikmann Karlsruher.
Schalke virtist ætla að halda út jafntefli en Marvin Wanitzek skoraði glæsilegt sigurmark fyrir Karslruher þegar tvær mínútur voru eftir af venjulegum leiktíma.
Schalke er í 8. sæti með 10 stig eftir 7 leiki. Karlsruher er í 3. sæti með 12 stig.