Það vakti athygli fyrr í dag þegar kom í ljós að Birkir Már Sævarsson væri í leikbanni gegn Þýskalandi. Forráðamenn KSÍ höfðu ekki fengið það staðfest fyrr en í gær, degi fyrir leik.
Birkir Már var rekinn af velli í síðasta landsleik Íslands undir stjórn Erik Hamren, liðið tapaði þá gegn Englandi á Wembley í nóvember. Tók hann út leikbann sitt í Þýskalandi í kvöld, þrátt fyrir að rauða spjaldið hafi verið í Þjóðadeildinni.
„Birkir Már, við vissum að hann fékk rautt spjald í Þjóðadeildinni. Við erum að byrja undankeppni HM hjá FIFA, við vorum ekki öruggir á því hvort hann tæki rauða spjaldið út. Við biðum eftir svari frá FIFA og UEFA, við vissum að þetta gæti gerst. Við unnum okkar vinnu. Mér fannst Alfons standa sig vel, sérstaklega í seinni hálfleik,“ sagði Arnar Þór um málið.
Allar líkur voru á því að Birkir myndi byrja leikin en Alfons Sampsted tók hans stöðu en gat enginn frá FIFA eða UEFA svarað því fyrr en í gær að Birkir væri í banni?
„Ég veit ekki hvernig þetta virkar allt saman, ég sem þjálfari er ekki að senda tölvupóst á FIFA og UEFA. Ég bíð eftir svörum, ég vinn mína vinnu þangað til að ég fæ þau svör. Ef Birkir Már hefði ekki verið í banni þá hefði hann kannski byrjað þennan leik en það er ekki hægt að velta sér upp úr því.“
