Knattspyrnumótið ReyCup fór fram í Laugardalnum síðastliðna helgi. 26 þáttakendur á mótinu fóru á bráðamóttöku Landspítalans vegna meiðsla en af þeim voru 15 með brotin bein. Samkvæmt yfirlækni á deildinni er þetta óvenju mikið. RÚV greinir frá þessu.

Hjalti Már Björnsson, yfirlæknir á deildinni, segir að álagið hafi verið mikið á bráðamóttökunni um helgina. „En einkum virtist vera áberandi að það leituðu til okkar alls 26 ungmenni sem að höfðu hlotið áverka eftir að hafa verið að keppa á Rey Cup,“ segir Hjalti. „Af þeim reyndust fimmtán vera með brotin bein, sem að okkur þykir vera dálítið mikill fjöldi af einu íþróttamóti.“

Þá segir Hjalti að það hafi ekki alltaf verið haldið utan um tölur yfir þetta en ef litið er til erlendra rannsókna þá telst þetta vera mikið. „Það er umhugsunarvert að ef að ungmenni eru að keppa á íþróttamóti og um einn af hverjum hundrað hlýtur beinbrot af leiknum,“ segir Hjalti og bætir við að það þurfi að skoða hvort það sé hægt að gera eitthvað til að draga úr tíðni á slíkum slysum.