Neil Ruddock fyrrum varnarmaður Liverpool og Tottenham var brjálaður í beinni útsendingu þegar Paul Merson vinur hans ræddi vandamál hans með áfengi við hann.

Ruddock drekkur mikið en Merson hætti að drekka fyrir rúmu ári og vill hjálpa vini sínum. Ruddock er Íslandsvinur en hann kom hingað til lands og tók hraustlega á því með Liverpool klúbbnum hér á landi árið 2010.

Þeir voru mætti í sjónvarpsþáttinn Harry’s Heroes þegar allt sauð upp úr. Ruddock var að sturta í sig áfengi þegar Merson benti honum á að hann væri að glíma við vandamál.

„Ekki tala svona við mig, annars ræðst ég á þig. Ég hendi þér út um hurðina. Farðu til fjandans,“ sagði Ruddock við Merson sem brast í grát.

Merson ræddi málið eftir deilur þeirra. „Það vill enginn deyja, ég hugsa að hann hafi orðið hræddur. Þú verður að hugsa um lífið og að taka einn dag í einu,“ sagði Merson.

Ruddock ræddi málið einnig eftir að hafa róað sig. „Það er í lagi að heyra svona ef þetta er einhver sem þú þekkir varla, þegar það kemur frá manni sem þú elskar þá særir þetta þig,“ sagði Ruddock sem grét talsvert.