Félög í ensku úrvalsdeildinni eru byrjuð að hóta félögum í fallbaráttu að þau verði dæmd niður, haldi þau áfram að vera með vandræði. Félögin í fallbaráttu vilja ekki hefja tímabilið á hlutlausum velli eins og allt stefnir í.

Stærri lið deildarinnar hóta því að fara fram með hörku ef félögin ganga ekki að þeim kröfum, þeim er hótað að tímabilið verði látið standa og lokastaða reiknuð út frá meðalstigum.

Þá myndu Norwich, Aston Villa og Bournemouth falla úr deildinni án þess að spila restina af tímabilinu.

Ríkisstjórn Boris Johnson, hefur beðið allar stærstu íþróttagreinar landsins um að byrja að undirbúa endurkomu. Ríkisstjórnin vonast til þess að íþróttir fari af stað í byrjun júní, með þessu vilja þau reyna að létta lundina hjá þjóðinni eftir erfiða tíma. Ekki hefur verið spilað í tæpa tvo mánuði vegna kórónuveirunnar.

Áhorfendur fá ekki að mæta á völlinn en vonir standa til um að alli 92 leikirnir verði í beinni útsendingu í ensku úrvalsdeildinni.

Stefnt er að því að hefja æfingar í næstu viku og hefja leik í júní. Deildin verður þá spiluð á sjö vikum og svo kemur viku frí.

Þá segir Mirror frá því að óttast sé að allt að 50 leikmenn muni hóta því að mæta ekki til æfinga eða í leiki vegna veirunnar, þeir eru sagðir óttast hana verulega

Mirror segir að búast megi við því að 2-3 leikmenn í hverju félagi muni óttast það að snúa aftur.