Knattspyrnusamband Íslands gerir kröfu á það að Reykjavíkurborg, eigandi Laugardalsvallar komi að kostnaði þegar kemur að landsleik Íslands og Rúmeníu í mars, um er að ræða leik í umspilli um laust sæti á EM. Rúv segir frá.
Þar kemur fram að Guðni Bergsson hafi sent Degi Bergþórusyni Eggertssyni, borgarstjóra Reykjavíkur bréf. KSÍ greiðir 64 milljónir í kostnað við að halda leikinn, þetta er í fyrsta sinn sem leikið verður á vellinum í mars.
KSÍ hefur lengi reynt að berjast við borg og ríki um að byggja nýjan völl en Laugardalsvöllur er einn lélegasti þjóðarleikvangur Evrópu, þegar kemur að vellinum sjálfum og aðbúnaði fyrir leikmenn.
,,Allar aðgerðir í fyrsta fasa, þar sem einnig má nefna aðkeypta sérfræðiþjónustu og rafmagns vegna flóðljósa, er áætlaður rúmar 23 milljónir króna,“ segir á vef RÚV og kemur fram að steinullin kosti fjórar milljónir en hana á að nota ef neyðin kallar til að hylja völlinn.
Hitatjald og tilkostnaður fyrir tæpar 35 milljónir en hingað koma menn frá Bretlandi sem sjá um tjaldið í þrjár vikur.
Þá segir á vef RÚV að kostnaður við að fa sérstakar veðurspár frá Veðurstofunni kosti milljón.
„Með þessu sýnir Reykjavíkurborg stuðning sinn við íslenska landsliðið og fótboltann almennt og hjálpar til við að það náist að leika þennan mikilvæga leik á Laugardalsvellinum í mars komandi,“ segir í bréfi Guðna sem RÚV vitnar til.