90 mínútur, hlaðvarpsþátturinn er í fullu fjöri þessa dagana. Gestur þáttarins að þessu sinni er Just a kid from Darlo sem vann gullskóinn.
Það hefur fátt annað verið rætt í sumar í Pepsi Max-deildinni en um Gary Martin.
Framherjinn sem Valur fékk en sparkaði út eftir nokkra leiki. Hann fór í ÍBV og vann gullskóinn.
Fyrr í sumar var Gary ásakaður um að hafa birt eigin launatölur og rætt þær opinberlega.
Talað var um að Gary væri með níu þúsund evrur á mánuði hjá Val sem myndi gera hann að launahæsta leikmanni liðsins.
Þessar sögur reyndust hins vegar vera kjaftæði og fengum við Gary til að opna sig aðeins um málið.
,,Það er ekki gaman að hlusta á þetta því þetta er allt kjaftæði. Fólk trúir þessu, í alvöru,“ sagði Gary.
,,Ég sendi þeim aðila sem birti þetta með launin skilaboð og sagði honum að ef hann vildi komast að sannleikanum þá ætti hann að spyrja mig ekki birta eitthvað sem var ekki rétt.“
,,Ef ég ætlaði að tala um launin mín þá væri það ekki í evrum eins og hann birti það, það væri í pundum eða krónum.“
,,Af hverju myndirðu birta þetta í evrum? Þá veistu um leið að þetta er kjaftæði. Það fór í taugarnar á mér, endalausar sögur.“
Það var einnig talað um að Hannes Þór Halldórsson og Birkir Már Sævarsson væru ekki hrifnir af Gary í klefa Vals.
Gary heyrði sjálfur af þeim sögusögnum og fékk hann skilaboð frá þeim báðum eftir að þær sögur fóru í loftið.
,,Ég vorkenndi Birki og Hannesi því þeir komu illa út úr þessu. Þeir sendu mér strax skilaboð áður en ég hafði séð þetta.“
,,Það eru tvær leiðir sem þú getur horft á þetta: Þeir eru að senda á þig því þeir eru með samviskubit eða ekki.“
,,Ég hef spilað mikið með Hannesi, tel ég að hann gæti gert þetta? Nei, Birkir? Nei. Bjarni Ólafur? Alls ekki. Ég sagði kannski fimm orð við Bjarna, hann er hljóðlátur og einbeitir sér að sjálfum sér. Hann er frábær náungi. Þegar hann segir eitthvað þá hlustarðu.“
,,Ég gat ekki trúað sumum af þessum sögum, fólk vill heyra þær. Því lengur sem þetta gengur á því verr fer þetta. Ég ræddi við Vísi og útskýrði málið, eitthvað sem Val líkaði ekki við. Ég held að það hafi ýtt þeim yfir línuna.“
