Víkingur Reykjavík er bikarmeistari árið 2019 en liðið lék við FH í úrslitaleiknum í kvöld.

Það var boðið upp á stemningu á Laugardalsvelli í kvöld en yfir 4000 þúsund manns létu sjá sig.

Það var aðeins eitt mark skorað í viðureigninni en það gerði Óttar Magnús Karlsson fyrir Víkinga.

Óttar skoraði mark sitt af vítapunktinum en dæmd var hendi á Þórð Þorstein Þórðarson.

Tveimur mínútum eftir mark Óttars fékk svo Pétur Viðarsson rautt spjald hjá FH eftir viðskipti við Guðmund Andra Tryggvason. Sá dómur er umdeildur.

Fleiri mörk voru þó ekki skoruð í leiknum og fagna Víkingar sigri í bikarnum þetta árið og eru á leið í Evrópukeppni.

Hér má sjá það góða og slæma úr leiknum.

Plús:

Frammistaða Víkings var frábær í leiknum, liðið yfirspilaði FH nánast allan fyrri hálfleikinn. Sigurinn var verðskuldaður.

Sigurvegari dagsins er Arnar Gunnlaugsson, hann þorði að veðja á unga menn, hann þorði að spila sóknarfótbolta og hann uppsker. Titill á fyrsta ári í þessu verkefni sem getur endað með þeim stóra.

Guðmundur Andri Tryggvason var frábær í leiknum, hann er líklega einn erfiðasti andstæðingur sem hægt er að eiga við. Hann fellur hratt til jarðar, rífur kjaft og komst alla leið inn í hausinn á leikmönnum FH.

Víkingar töluðu leikinn upp, stærsti leikur ársins og þeir komu þannig inn í hann. Áfallið að missa Kára Árnason út í vikunni, þjappaði liðinu saman. Magnað afrek hjá Víkingum.

Mínus:

Pétur Guðmundsson dómari og Ívar Orri Kristjánsson, aðstoðardómari áttu ömurlegan dag. Pétur var úti á túni í fyrri hálfleik og Ívar ákvað að reka Pétur Viðarsson leikmann FH, af velli eftir viðskipti við Guðmund Andra.

Brandur Olsen og Björn Daníel Sverrisson sem eiga að bera upp miðsvæði FH og búa til sóknir, gerðu ekkert í leiknum. Brandur var hauslaus allan leikinn.