Garðar Gunnlaugsson, hefur líklega spilað sinn síðasta leik á ferlinum. Ástæðan eru slæm meiðsli í baki.
Garðar gekk í raðir Vals frá ÍA fyrir tímabilið en lengi vel lék hann sem atvinnumaður.
Garðar hefur lítið getað spilað vegna brjósklos í neðra baki. ,,Fótboltaskórnir eru því að öllum líkindum komnir á hilluna frægu þó maður vilji nú aldrei loka endanlega á þær dyr,“ skrifar Garðar á Instagram.
Fyrr í sumar gerði Garðar upp feril sinn í ítarlegu viðtali, það má heyra hérna.
Færsla Garðars:
Fyrr í sumar fékk ég brjósklos í neðra bak sem hefur aftrað mér frá því að gera sem ég elska mest, að spila fótbolta. Endurhæfingin hefur gengið hægt með ýmsum áföllum og niðurstaðan var sú í samráði við sjúkrateymi Vals að ég myndi ekki ná að spila neitt það sem eftir væri af sumrinu og fókusinn væri bara á að ná heilsu aftur.
Með góðfúslegu leyfi Vals fékk ég að fara til Ítalíu í nokkra daga ásamt Fanney til að undirbúa flutning fjölskyldunnar í haust/vetur til N-Ítalíu sökum vinnu. Ég mun þar starfa hjá fyrirtæki sem heitir Gili Creations ( www.gilicreations.com ) sem hefur meðal annars komið að framleiðslu og uppsetningu á innréttingum á stórum hótelum á Íslandi ásamt víðsvegar um heiminn.
Fótboltaskórnir eru því að öllum líkindum komnir á hilluna frægu þó maður vilji nú aldrei loka endanlega á þær dyr.
Langar að þakka öllum þeim sem ég hef starfað með og kynnst á þessum langa, brösótta en jafnframt skemmtilega ferli❤️ Love GG