Breiðablik hefur náð samkomulagi við hollenska félagið PSV Eindhoven um að Berglind Björg Þorvaldsdóttir fari út á láni næstu þrjá mánuði. Hún mun snúa aftur til Blika fyrir fyrsta leik í Pepsi-deildinni þann 2. maí.
Berglind átti frábær tímabil þegar Breiðablik varð Íslands- og bikarmeistari í fyrra. Hún skoraði 19 mörk í 18 leikjum í deildinni og varð markadrottning deildarinnar. Þá skoraði hún fjögur mörk í fjórum bikarleikjum.
Berglind hefur spilað 172 leiki fyrir Breiðablik og skorað í þeim 118 mörk. Þá á hún að baki 35 A-landsleiki fyrir Íslands hönd, nú síðast gegn Skotlandi á Spáni fyrr í vikunni.
Berglind fór á sína fyrstu æfingu hjá nýju félagi í gær en þar rakst hún strax á átrúnaðargoð sitt, Ruud van Nistelrooy.
Nistelrooy var einn besti sóknarmaður í heimi þegar hann lék með Manchester United og Real Madrid en hann er í dag í þjálfarateyminu hjá karlaliði PSV.
Mynd af þeim saman má sjá hér að neðan.
When you meet your idol…? pic.twitter.com/ZMk7NAz1w4
— Berglind Thorvaldsd (@berglindbjorg10) January 28, 2019