Brasilíumaðurinn Malcom gekk í raðir Barcelona á dögunum en hann kom frá franska liðinu Bordeaux.

Malcom var hársbreidd frá því að fara til Roma en hann var á leið í læknisskoðun hjá félaginu er Barcelona blandaði sér í málið.

Monchi, yfirmaður knattspyrnumála Roma, hafði rætt við leikmanninn og umboðsmann hans og virtist allt vera klárt svo að Roma gæti keypt sóknarmanninn.

James Pallotta, forseti Roma, er æfur út í spænska liðið sem reyndi síðar að biðjast afsökunar á því hvernig þeir tryggðu sér leikmanninn.

,,Malcom? Barcelona kom sér inn í þetta og þeir gerðu það á ósiðferðislegan hátt,“ sagði Pallotta við Sirius XM Radio.

,,Monchi var staddur á myndbandsfundi með umboðsmanni Malcom sama morgun og hann sagði við hann ‘ sjáðu Monchi, ég klæðist rauðu, við höfum náð samkomulagi’.

,,Við höfum fengið ráðgjöf frá lögfræðingum varðandi þessa stöðu og það er útlit fyrir að Bordeaux muni segja sína hlið.“

,,Barcelona hringdi meira að segja í okkur til að biðjast afsökunar en ég tek afsökunarbeiðninni ekki. Ég mun aðeins taka henni ef þeir senda okkur Lionel Messi.“