Kærleikurinn ræður ríkjum að Þverholti 5 í Mosfellsbæ, en þar er Kærleikssetrið til húsa, sem Friðbjörg Óskarsdóttir stofnaði árið 2005. Þar er hægt að panta einkatíma, sækja námskeið og hugleiðslustundir eða koma í hópvinnu.

„Hér hjá Kærleikssetrinu fjöllum við um allt sem lýtur að þroska manneskjunnar, jafn andlegum, sálrænum og líkamlegum þroska, því bæði verður að rækta líkamann og innri mann og sál,“ segir Friðbjörg.

Kjarninn mannræktarskóli

Friðbjörg leiddi áður hópstarf hjá Sálarrannsóknafélagi Íslands, en árið 2007 stofnaði hún ásamt fleiri konum Kjarnann, mannræktarskóla Kærleiksseturs. Markmið skólans er að aðstoða fólk við að tengjast eigin kjarna og eflast í að hlusta á innsæið.

„Grunnur kennslunnar er „Kjarnavinna,“ sem er sjálfsvinna þar sem aðaláhersla er lögð á að tengjast kjarnanum, tengingu við æðra sjálfið, innri þekkingu sem við höfum öðlast í gegnum líf okkar nú og fyrri líf, auka næmnina og tengjast hæfileikum okkar, einnig efling í að hlusta á innsæið, sem er í raun það eina í lífinu sem er fullkomlega treystandi. Einnig að styrkja sjálfsmyndina,“ segir Friðbjörg.

Allar tilfinningar eiga rétt á sér

„Það er gott að viðurkenna allar tilfinningar, bæði góðar sem slæmar, og ekki að byrgja inni neikvæðar tilfinningar, heldur vinna úr þeim,“ segir Friðbjörg.

Hún telur að kenna mætti einstaklingum mun fyrr slökun og sálarrækt, „það ætti að byrja snemma að kenna börnum sálarrækt og slökun, bara sem fyrst í grunnskóla.“

Kærleikssetrið hefur upp á margt að bjóða

Á meðal þess sem boðið er upp á í Kærleikssetrinu eru einkatímar, námskeið, fyrirlestrar, skyggnilýsingar, barnahópar, heilun og opið hús svo aðeins eitthvað sé nefnt.

Í Kærleikssetrinu er einnig rekið lítið gallerý þar sem meðal annars eru til sölu hugleiðsludiskar, reykelsi , myndlist og skart.

Kærleikssetrið er að Þverholti 5, Mosfellsbæ. Sími 567-5088 og netfang kaerleikssetur@kaerleikssetur.is
Heimasíða: kaerleikssetrid.is og Facebook: Kaerleikssetrid.Mosfellsbae.