„Þau báðu um að fá að skjótast á bílnum upp í Grafarholt og sögðust koma eftir korter. Ég hef ekki séð bílinn síðan og þau svara ekki í síma. Ég er búinn að tilkynna þetta til lögreglu. Mér skilst að þetta sé ógæfufólk sem stundi þetta, að þykjast skoða bíla sem eru til sölu og stela þeim. Ástæðan er sú að þau eru heimilislaus og vantar næturstað.“

Þetta segir Nicolai Þorsteinsson en hann auglýsti nýlega bíl til sölu á bland.is, svartan og gráan Ford Escape árgerð 2006, bílnúmer FO 567. Sjá einnig myndir af bílnum með fréttinni.

Par eitt hringdi í Nicolai og vildi fá að skoða og prufukeyra bílinn.

„Ég fór bara með þeim og við keyrðum dálítinn spöl hérna í Seljahverfinu. Síðan spyr maðurinn hvort hann megi skjótast sem snöggvast á bílnum upp í Grafarholt. Hann verði bara í korter. Ég varð við því.“

Nicolai fékk hins vegar fljótt bakþanka og hringdi í manninn, en hann var bæði með símanúmer fólksins og var búinn að sjá skilríki konunnar:

„En hann segir bara að þau séu alveg að verða kominn og hann skili bílnum rétt bráðum. En bílinn hef ég ekki séð síðan og þau svara ekki í símann.“

Kæru lesendur. Vinsamlega hafið vakandi auga fyrir þessum bíl. Líklegt er að fólkið láti fyrirberast í honum um nætur. Hver sá sem hefur ábendingar um hvar bíllinn gæti verið niðurkominn er beðinn um að hafa samband við lögregluna í síma 444 1000, eða leggja inn skilaboð á Facebook-síðu, lögreglunnar eða nýta ábendingaform á heimasíðu lögreglunnar.