Þeir Cristiano Ronaldo og Lionel Messi eru taldir bestu leikmenn heims í dag og hafa verið á toppnum í mörg ár.
Ronaldo raðaði inn mörkum fyrir Real Madrid á Spáni áður en hann samdi við Juventus í sumar.
Messi er þá enn á mála hjá Barcelona þar sem hann hefur verið síðan hann var krakki og er ekki ólíklegt að hann endi ferilinn hjá félaginu.
Messi hefur skorað 655 mörk í 831 leikjum á ferlinum og Ronaldo hefur gert 680 mörk í 960 leikjum.
Eru þeir markahæstu leikmenn sögunnar? Svarið er nei en fimm aðrir leikmenn eru fyrir ofan tvímenningana ef skoðað er markahæstu leikmenn allra tíma ef allir leikir eru teknir með.
Í fimmta sæti er Þjóðverjinn Gerd Muller sem spilaði 793 leiki á ferlinum og skoraði heil 735 mörk.
Ferenc Puskas sem spilaði frá 1943 til 1966 skoraði 746 mörk er í fjórða sæti og í því þriðja situr Pele, einn besti leikmaður sögunnar en hann kom boltanum 767 sinnum í netið.
Í öðru sæti er hinn brasilíski Romario sem skoraði 772 mörk í 994 leikjum. Hann lagði skóna á hilluna árið 2009.
Í fyrsta sæti er svo hinn tékknenski Josef Bican. Hann lék lengst með Slavia Prague á sínum tíma og gerði 395 mörk í 217 leikjum. Hann gerði alls 805 mörk á ferlinum.
Bican var frábær leikmaður en hann lagði skóna á hilluna árið 1955. Samkvæmt tölfræði Rec. Statistics er hann markahæsti leikmaður allra tíma.
Markahæstu leikmenn allra tíma:
7. Lionel Messi – 655 mörk
6. Cristiano Ronaldo – 680 mörk
5. Gerd Muller – 735 mörk
4. Ferenc Puskas – 746 mörk
3. Pele – 767 mörk
2. Romario – 772 mörk
1. Josef Bican – 805 mörk
