Viðar Örn Kjartansson framherji Rostov hefur nokkuð óvænt hætt með íslenska landsliðinu í fótbolta.
Viðar greinir frá þessu á Instagram en fimm dagar eru síðan að hann var síðast í landsliðshóp Íslands.
Viðar var ónotaður varamaður gegn bæði Frakklandi og Sviss og hefur ákveðið að einbeita sér að félagsliði sínu, 28 ára gamall.
,,Elskaði hverja stund með landsliðinu en núna er augnablikið til að hætta, tími fyrir næstu kynslóð. Takk fyrir allt,“ skrifar Viðar.
Viðar lék 19 A-landsleiki og skoraði í þeim tvö mörk en hann missti af sæti í bæði EM og HM hópi Íslands en var alltaf í kringum liðið þess á milli.
Síðasti landsleikur Viðars kom í september þegar Ísland tapaði 6-0 gegn Sviss.
