Þótt ótrúlegt megi virðast lifðu John og Yvette skotárásina af, en John, sem er þingmaður Demókrata á ríkisþingi Minnesota, var skotinn níu sinnum en Yvette átta sinnum. Boulter var handtekinn í gærkvöldi en hann er grunaður um að hafa myrt Melissu Hortman, þingmann Demókrata og eiginmann hennar, Mark, þennan sama dag.
Í yfirlýsingu á Instagram sagði Yvette að þau hjónin væru miður sín vegna atburða laugardagsins.
„John hefur gengist undir margar aðgerðir og með hverri klukkustundinni sem líður kemst hann nærri því að komast út úr skóginum. Hann var skotinn níu sinnum en ég átta sinnum og við erum ótrúlega heppin að vera á lífi. Við erum í öngum okkar yfir örlögum Melissu og Marks. Við eigum engin orð til að lýsa því.“
Boelter klæddi sig upp sem lögreglumaður þegar hann skaut hjónin en hann lagði á flótta í kjölfarið. Lögregla fékk ábendingu um að hann væri í Minneapolis í gær og var hann handtekinn í úthverfi borgarinnar í gærkvöldi.
Í frétt CNN kemur fram að í fórum hans hafi meðal annars fundist listi með nöfnum yfir möguleg skotmörk. Telur lögregla að hann hafi ætlað sér að ráðast á fleiri einstaklinga, þingmenn þar á meðal. Þá fundust þrjú skotvopn af gerðinni AK-47, ein skammbyssa og skotfæri í bifreið hans.
