Ástæðan fyrir hinum mikla eggjaskorti í Bandaríkjunum er fuglaflensan skæða. Til að halda smitinu niðri eru fuglar aflífaðir í stórum stíl þar sem veiran finnst. Fram að þessu hafa rúmlega 160 milljónir varphænsna verið aflífaðar, þar af 30 milljónir það sem af er þessu ári.
Þetta hefur haft miklar verðhækkanir í för með sér og er meðalverðið á 12 eggjum nú sem svarar til um 720 íslenskum krónum að sögn Al Jazeera.
Það er þetta hækkandi verð sem veldur því að landbúnaðarráðuneytið grípur nú til aðgerða. Ráðuneytið mun verja einum milljarði dollara í verkefnið. 500 milljónir fara í forvarnaraðgerðir, 100 milljónir í rannsóknir og þróun á bóluefnum og 400 í beinan fjárstuðning við hænsnabændur. BBC skýrir frá þessu.
Bandaríkin eru venjulega sjálfum sér næg hvað varðar eggjaframleiðslu en nú þarf að leita til útlanda til að fá egg. Til dæmis á að kaupa 420 milljónir eggja í Tyrklandi á þessu ári. Þetta eru sex sinnum fleiri egg en Bandaríkin keyptu frá Tyrklandi á síðasta ári.
En þessar 420 milljónir eggja eru aðeins dropi í hafið því að á síðasta ári voru 109 milljarðar eggja framleiddar í Bandaríkjunum á fyrstu 11 mánuðum ársins.
