Auðkýfingurinn Elon Musk er aftur byrjaður að hrauna yfir fjárlagafrumvarp Bandaríkjaforseta, en hann segir að verði frumvarpið samþykkt muni það valda þjóðinni gríðarlegum skaða.
Musk hafði að mestu slakað á gagnrýninni eftir að honum tókst að móðga forsetann hressilega fyrir skömmu. Þá hafði komið til orðaskipta milli fyrrum félaganna á samfélagsmiðlum og gaf Musk það meðal annars til kynna að Donald Trump væri að leyna gögnum í tengslum við kynferðisbrotamanninn Jeffrey Epstein. Musk sagði að nafn Trump væri að finna í þessum gögnum og gaf auðkýfingurinn það sterklega að kynna að birting gagnanna kæmi sér illa fyrir forsetann.
Trump hótaði því á móti að beita embætti sínu gegn fyrirtækjum Musk og fór svo að lokum að Musk sá að sér og reyndi að rétta fram sáttarhönd sem Trump fúlsaði þó við. Musk eyddi í framhaldinu nokkrum færslum og hefur að mestu haldið sér á mottunni síðan, eða þar til núna um helgina.
„Nýjasta útgáfa öldungarþingsins af fjárlagafrumvarpinu gæti rústað milljón störfum í Bandaríkjunum og valdið gífurlegu stefnumótandi tjóni fyrir þjóð okkar. Þetta er algjörlega sturlað og eyðileggjandi. Þetta færir atvinnugreinum fortíðarinnar ívilnanir á silfurfati en skaðar á sama tíma atvinnugreinar framtíðarinnar með alvarlegum hætti.“
The latest Senate draft bill will destroy millions of jobs in America and cause immense strategic harm to our country!
Utterly insane and destructive. It gives handouts to industries of the past while severely damaging industries of the future. https://t.co/TZ9w1g7zHF
— Elon Musk (@elonmusk) June 28, 2025
Musk deildi einnig skoðanakönnun sem hann telur sanna að Repúblikanar væru að fremja pólitískt sjálfsvíg með því að samþykkja frumvarpið, sem meðal annars muni auka halla ríkissjóðs um billjónir næsta áratuginn. Musk segir að þessi fjárlög muni koma Bandaríkjunum í ánauð ósjálfbærra skulda. Bandaríkin væru ekki að skjóta sig í fótinn með þessu frumvarpi heldur beint í brjóstkassann.
Polls show that this bill is political suicide for the Republican Party pic.twitter.com/HJwKZ9g4tu
— Elon Musk (@elonmusk) June 28, 2025
Repúblikanar komust skrefi nær því í gær að fá frumvarpið samþykkt, þegar þingið samþykkti með 51 atkvæði gegn 49 að vísa frumvarpinu í lokaumræðu. Nú stefnir í maraþonumræður á þingi þar sem þingmenn demókrata hafa meðal annars tilkynnt að þeir ætli að krefjast þess að allt frumvarpið, sem er um 940 blaðsíður, verði lesið upphátt fyrir þingið.
