Það er þó eflaust mörgum léttir að vísindamennirnir voru ekki að rannsaka hvort stærð getnaðarlima skipti máli þegar kemur að ánægju kvenna í kynlífi. Þeir voru að rannsaka hvort stærðin skipti máli hvað varðar frjósemi karla. The Times skýrir frá þessu.
Vísindamennirnir rannsökuðu gögn um 815 karla og komust að því að karlar sem glímdu ekki við frjósemisvanda voru að meðaltali með 13,4 sm langa getnaðarlimi og er þá miðað við lim í fullri reisn. Þeir sem glímdu við frjósemisvanda voru hins vegar að meðaltali með 12,5 sm langa getnaðarlimi í fullri reisn.
Austen Slade, sem stýrði rannsókninni, segir að karlar þurfi þó ekki að óttast um frjósemi sína þótt getnaðarlimir þeirra séu í styttra lagi að þeirra mati því ýmislegt bendi til að frjósemi eða skortur á henni sé meðfæddur eða erfðafræðilegur þáttur.
Sheena Lewis, læknir og sérfræðingur í frjósemi við háskólann í Belfast á Norður-Írlandi, segir að hún telji ekki að læknar fari að gera meira af því að mæla lengd getnaðarlima sjúklinga sinna þótt þessi niðurstaða liggi fyrir.
„Eitt af því sem hræðir karla er að stærðin skipti máli. Að segja að það séu minni líkur á að þeir verði feður eru ekki góð skilaboð. Þetta er mjög frumleg hugmynd en rannsóknin segir okkur ekki hver eðlileg lengd getnaðarlims er.”
