Belinda Taylor, 48 ára, og leiðbeinandi hennar, hinn þrítugi Adam Harrison, hröpuðu til jarðar en talið er að bilun hafi orðið í búnaði Adams sem varð til þess að hvorki aðalfallhlífin né varafallhlífin opnuðust. Þau voru skorðuð saman og hröpuðu stjórnlaust til jarðar úr um 15.000 feta hæð.
Í fréttum breskra fjölmiðla kemur fram að kærasti Belindu, Scott, hafi fylgst með stökkinu úr sjónauka og drifið sig á vettvang þegar hann sá að fallhlífin opnaðist ekki. Hafði hann gefið Belindu stökkið í gjöf fyrir skemmstu.
Í samtali við Mail Online segir Elias, sonur Belindu, að hann hafi rætt við móður sína nokkrum dögum fyrir harmleikinn og hún haft á orði að kannski væri ekki sniðugt að fara í fallhlífarstökk á föstudaginn þrettánda.
„Það er skrýtið að hugsa um þetta en hún sagði þetta í hálfgerðu gríni,“ segir hann. Belinda lætur eftir sig tvö börn, Elias og dótturina Emily sem bjó hjá henni.
Elias segir að ekki hafi fengist neinar upplýsingar um hvað fór úrskeiðis í stökkinu. „Við viljum fá að vita hvað gerðist, ég held að það myndi hjálpa okkur að öðlast ákveðna sálarró,“ segir hann.
Undir þetta tekur fyrrverandi eiginmaður Belindu og barnsfaðir, Bachir Baaklini. „Þetta hefði ekki átt að gerast. Við verðum að fá það á hreint af hverju börnin misstu móður sína,“ segir hann.
Hann segir að þau hafi alla tíð átt í góðum samskiptum eftir að þau skildu. „Ég sá hana á tveggja til þriggja vikna fresti en hún talaði oftar við eiginkonu mína en mig. Þeim kom mjög vel saman.“
Slysið er nú til rannsóknar hjá breskum flugmálayfirvöldum og verða frekari upplýsingar ekki veittar fyrr en þeirri rannsókn lýkur.
