The Guardian skýrir frá þessu og segir að niðurstöður rannsóknar breskra og hollenskra vísindamanna bendi til þess að það hafi jákvæð áhrif á líkamann að drekka kaffi.
Rúmlega 1.700 ristilkrabbameinssjúklingar tóku þátt í rannsókninni. Niðurstaða hennar er að þeir sem drukku að minnsta kosti fimm kaffibolla á dag voru í 32% minni hættu á að fá krabbamein á nýjan leik.
Einnig kom í ljós að lífslíkur þeirra sjúklinga, sem drukku kaffi, voru meiri en þeirra sem ekki drukku kaffi. Mestu áhrifin virtust vera hjá þeim sem drukku mest kaffi.
Ellen Kampman, aðalhöfundur rannsóknarinnar, segir niðurstöðurnar vera „heillandi“ en leggur áherslu á að niðurstaðan sýni tölfræðilegt samhengi á milli kaffineyslu og hættunnar á að fá krabbamein á nýjan leik. Með öðrum orðum þá liggur ekki fyrir hvort um bein orsakatengsl sé að ræða.
Hún sagði að vísindamennirnir vonist til að niðurstaðan sé í raun sú að magnið skipti máli, þeim mun meira kaffi sem sé drukkið, þeim mun meiri séu áhrifin.
Fyrri rannsóknir hafa sýnt að kaffidrykkja getur haft margvísleg jákvæð áhrif á heilsu fólks. Til dæmis dregur hún úr hættunni á krabbameini í lifur og leghálsi. Hún dregur einnig úr hættunni á að fá sykursýki 2, Parkinsonssjúkdóminn, blóðtappa og þess háttar. En í niðurstöðum þessara fyrri rannsókna kemur fram að ávinningurinn sé mestur ef kaffineyslan er 3-4 bollar á dag.
