Skosku alzheimerssamtökin benda á að nú þegar jólin eru að ganga í garð komi fjölskyldur saman og þá geti ættingjar hugsanlega komið auga á að lítt þekkt einkenni elliglapa sé farið að hrjá ástvini.
Mirror segir að í ábendingu samtakanna komi fram að þetta einkenni sjáist hugsanlega þegar fólk gengur upp eða niður stiga.
„Fólk telur oft að minnistap og elliglöp séu það sama en það eru önnur lykileinkenni og merki sem er vert að taka eftir. Sérhver elliglapasjúklingur er einstakur. Það fer eftir því hvaða svæði heilans skemmast mest hvernig sjúkdómurinn leggst á þá,“ sagði talskona samtakanna.
Lítt þekkt einkenni elliglapa er líkamlegs eðlis en það hefur áhrif á hreyfingar sjúklinga. Þetta getur verið afleiðing af hnignandi getu til að geta áætlað fjarlægð því heilinn á í erfiðleikum með að vinna úr upplýsingum um hluti.
Þetta getur haft í för með sér að manneskja, sem glímir við elliglöp, getur átt erfitt með að ganga upp og niður stiga. Hún getur átt í erfiðleikum með að lyfta fótunum og geta átt frekar á hættu að renna, hrasa og detta. Talskona samtakanna sagði að ef fólk veiti því athygli að einhver eigi í erfiðleikum með að ganga upp eða niður stiga, sem og ef annarra einkenna elliglapa verður vart, sé rétt að ráðfæra sig við heimilislækni viðkomandi.