Leigusali að nafni Stepha birti á dögunum myndband á samfélagsmiðlinum TikTok en í myndbandinu sýnir hún slæmt ásigkomulag á íbúð sem hún var að leigja út. Hún segist hafa þurft að henda leigjandanum úr íbúðinni vegna vandamála sem komu upp en til að mynda höfðu aðrir leigjendur kvartað yfir honum. Þegar Stepha tók aftur við íbúðinni fann hún viðbjóðslega lykt koma úr svefnherberginu í íbúðinni.

Þegar hún opnaði dyrnar á svefnherberginu kom í ljós hvers vegna það var svona vond lykt en allt var í drasli í svefnherberginu. „Guð minn góður, þetta lyktar svo illa,“ sagði Stepha er hún opnaði inn í herbergið og sýndi fylgjendum sínum inn í það. Töluvert magn af óhreinum diskum, skálum og bollum var að finna í herberginu, auk mikils fjölda af umbúðum af skyndibita. Þá voru einnig stórir fullir ruslapokar í herberginu.

Í fataskápnum voru svo ennþá fleiri pokar af drasli, meðal annars frá Burger King. Í skrifborðsskúffunum var svo að finna meira af óhreinu leirtaui og rusli, sömu sögu var svo að segja um náttborðsskúffurnar en þar var einnig óhreint leirtau og mikið af rusli.

Í athugasemdunum við myndbandið furða netverjar sig á óþrifnaðinum og því að einhver gæti haft svefnherbergið sitt svona. „Þetta er ógeðslegt, ég myndi rukka fyrir þrifin,“ segir til dæmis einn netverji. „GUÐ MINN GÓÐUR! Hver setur óhreina diska Í SKÚFFURNAR?“ spyr svo annar.

Ekki voru þó allir netverjarnir í sjokki, sumir þeirra hugsuðu til þess sem leigði íbúðina og bentu á að sá gæti átt erfitt. „Ég velti því fyrir mér hversu illa þeim leið andlega til að skilja þetta svona eftir,“ segir til dæmis einn af netverjunum sem hugsar til leigjandans.

Myndbandið má sjá hér fyrir neðan:

@stephadiy Gross, disgusting, how do people live like this??? @FailArmy @Vale Fails ♬ original sound – StephaDIY