Í mars stálu norðurkóreskir tölvuþrjótar rafmynt að verðmæti sem svarar til um 80 milljarða íslenskra króna. Rafmyntinni náðu þeir í gegnum tölvuleikinn Axie Infinity. Norska efnahagsbrotalögreglan telur að um 750 Norðmenn séu meðal fórnarlambanna í málinu og hafi þrjótarnir stolið sem nemur um 700 milljónum íslenskra króna frá þeim.

Dagbladet segir að á fréttamannafundi efnahagsbrotadeildarinnar í gær hafi verið tilkynnt að deildin rannsaki nú málið í samvinnu við bandarísku alríkislögregluna FBI. Vonast yfirvöld til að finna rafmyntina áður en búið verður að „hvítþvo“ hana og koma þannig í umferð.

Marianne Bender, ríkissaksóknari, sagði að tölvuþrjótarnir hafi nú þegar hrundið umfangsmiklum peningaþvættisaðgerðum í framkvæmd. Það þurf að koma rafmyntinni í gegnum slíkt ferli til að hún verði að peningum í höndum þrjótanna.

FBI telur að tölvuþrjótarnir starfi á vegum norðurkóresku leyniþjónustunnar.