Það getur kannski verið að mörgum finnist nikótínpúðar ekki dýrir en heilsufarslegur kostnaður af notkun þeirra getur verið hár. Danskir tannlæknar og læknar hafa miklar áhyggjur af notkun ungs fólks á nikótínpúðum en notkun Dana á aldrinum 15 til 29 ára á reyklausum nikótínvörum, til dæmis munntóbaki, snúsi og nikótínpúðum, hefur færst í vöxt að undanförnu.

Í umfjöllun Danska ríkisútvarpsins um málið kemur fram að bæði læknar og tannlæknar vari við notkun nikótínpúða og bendi á að þeir geti bæði eytt tannholdi og valdið heilaskemmdum.

Ný skýrsla sem danska lýðheilsustofnunin gerði sýnir að 11,4% ungmenna nota nikótínvörur í dag.

Camilla Rathcke, formaður danska læknaráðsins, sagði að nikótín hafi áhrif á þroska heilans og nikótín í því magni, sem er í nikótínpúðum, skaði heila sem eru að þroskast.