George Banks, 83 ára fjöldamorðingi, dó í Phoenix-ríkisfangelsinu í Pennsylvaníu á sunnudag. Banks var einn alræmdasti fjöldamorðingi Bandaríkjanna en hann var dæmdur í lífstíðarfangelsi fyrir að skjóta 13 manns til bana árið 1982.

Banamein Banks var krabbamein.

Þennan örlagaríka dag skaut Banks fjórtán manns, en þrettán létust. Á meðal þeirra sem létust voru fimm börn hans á aldrinum eins til sex ára og fjórar barnsmæður hans.

Þetta var eitt versta fjöldamorð í sögu Bandaríkjanna á þessum tíma.

Í umfjöllun AP er rifjað upp að Banks hafði setið að sumbli í gleðskap í Wilkes-Barre þegar hann sótti sér skotvopn að gerðinni AR-15 og fór heim til sín þar sem hann hóf skothríðina.

Eftir ódæðið á heimili sínu rakst hann á fjögur ungmenni í nágrenninu og skaut hann tvö þeirra með þeim afleiðingum að annað þeirra lést.

Banks var handtekinn á heimili vinar síns eftir umsátur lögreglu og í yfirheyrslum sagðist hann hafa drepið börnin sín svo þau þyrftu ekki að alast upp í „rasísku samfélagi“.

Banks var dæmdur til dauða árið 1985 og átti að taka hann af lífi í mars 1996. Áfrýjun lögmanna hans bar að lokum árangur og var dómnum breyt tí lífstíðarfangelsi.