Skoska lögreglan hefur greitt fjölskyldu Lamara Bell eina milljón punda, sem svarar til rúmlega 170 milljóna íslenskra króna, í bætur. Ástæðan er að lögreglan brást ekki við símhringingu bónda eins sem hafði séð skemmdan bíl utan vegar við M9 hraðbrautina 2015. Bell lá slösuð í bílnum í þrjá daga áður en lögreglan kom á vettvang. Maki hennar, John Yuill, 28 ára, var látinn þegar að var komið.

Lögreglan fór ekki á vettvang fyrr en annar vegfarandi hafði tilkynnt um bílinn. Þegar lögreglumenn komu á vettvang var Yuill látinn og Bell, sem var 25 ára, var alvarlega slösuð. Hún lést á sjúkrahúsi fjórum dögum síðar. Hún lét eftir sig tvö börn, 5 og 10 ára. Börnin, sem eru nú í umsjá afa síns og ömmu, fá 500.000 pund í bætur hvort. Sky News skýrir frá þessu.

Lögreglan viðurkenndi að hafa ekki brugðist rétt við tilkynningunni og baðst afsökunar. Dómur féll í málinu í september og var lögreglan fundin sek um að hafa brotið gegn skyldum sínum. Lögmaður fjölskyldunnar, David Nellaney, sagðist fagna bótagreiðslunni en gagnrýndi lögregluna fyrir að hafa ekki gengið til sátta í málinu á fyrri stigum þess.