Dómsmálaráðherra Bandaríkjanna, Pam Bondi, tilkynnti fyrir helgi að ráðuneyti hennar ætlaði að senda alríkiseftirlitsaðila til Kaliforníu til að vakta kjörstaði þegar kosningar fara fram í ríkinu þann 4. nóvember næstkomandi.

Á kjörseðlinum er svokölluð Tillaga 50, þar sem ríkisstjórinn leggur til nýja kjördæmaskipan fyrir þingkosningarnar á næsta ári. Tillagan er viðbragð demókrata við aðgerðum ríkja þar sem repúblikanar eru við völd, en þar er verið að endurskipuleggja kjördæmaskipan til að auka líkur á að Repúblikanar vinni kosningarnar.

Ríkisstjóri Kaliforníu, Gavin Newsom, telur ljóst að eftirlitsaðilunum sé ætlað að skapa tortryggni um niðurstöðu kosninganna þann 4. nóvember og ætlar ekki að taka því þegjandi og hljóðalaust. Hann segir að hér sé ríkisstjórn Trump með beinum hætti að reyna að hafa afskipti af kosningum sem séu á forræði Kaliforníu.

„Þetta er of langt gengið,“ sagði Newsom á föstudaginn.

Nú hefur dómsmálaráðherra Kaliforníu, Rob Bonta, tilkynnt að Kalifornía muni senda sína eigin eftirlitsmenn til að vakta alríkiseftirlitsmennina frá Pam Bondi. Það sé nauðsynlegt til að tryggja að traust ríki um kosningarnar og til að tryggja að alríkiseftirlitsmennirnir fylgi kosningalögum og til að koma í veg fyrir að Trump reyni að grafa undan lýðræðilegri niðurstöðu kosninga. Bonta sagði 100 prósent líkur á að því alríkismennirnir muni annars koma með falskar ásakanir um kosningasvindl.