Síðasta fimmtudag var sænski rapparinn Einár, sem hét réttu nafni Nils Grönberg, skotinn til bana í Hammarby í Stokkhólmi. Lögreglan hefur yfirheyrt á annað hundrað manns vegna málsins en enginn hefur verið handtekinn. Nú hefur því verið velt upp hvort mistök dómstóls hafi kostað Einár lífið.

Hann var einn vinsælasti rapparinn í Svíþjóð. Hann var 19 ára og hafði unnið til margra verðlauna fyrir tónlist sína.

Vitað var að fé hafði verið lagt til höfuðs honum af glæpasamtökum og naut hann verndar hvað varðar skráningu persónuupplýsinga þar sem hvergi mátti koma fram hvar hann átti heima, símanúmer hans eða annað persónutengt.

Aftonbladet segir að í dómi frá Þingrétti í Stokkhólmi frá í vor komi heimilisfang hans fram og hafi ekki verið fjarlægt eins og gera hefði átt. Um er að ræða dóm í fíkniefnamáli en fíkniefni fundust á heimili hans.

Ein af lykilspurningunum í rannsókninni á morðinu er hvernig morðinginn eða morðingjarnir vissu hvar Einár bjó. Þarna gæti því verið komin tenging við það.

Á síðasta ári var honum rænt af félögum í glæpagengi sem er kennt við Vårby. Eftir það naut hann verndar hvað varðar skráningu persónuupplýsinga í opinberum skrám. En sú vernd virðist hafa gleymst þegar dómur var skrifaður í fyrrgreindu fíkniefnamáli.

Aftonbladet hefur eftir Sven-Erik Alhem, talsmanni samtaka þolenda afbrota og fyrrum saksóknara, að þetta sé skelfilegt. Ekki bara fyrir þolandann og trú og traust almennings á getu hins opinbera til að vernda fólk sem nýtur verndar á borð við þá sem Einár átti að njóta.

Ekki er hægt að sjá hvort einhver hafi fengið afrit af dómnum því Þingrétturinn heldur ekki skrá yfir þá sem fá afrit af dómum.

Samkvæmt reglum eiga dómstólar að afmá upplýsingar, úr dómum, um fólk sem á á hættu að verða beitt ofbeldi eða hótað.