Í tengslum við rannsókn á öðru máli komst danska lögreglan á slóð 27 ára sjómanns frá Vejen á Jótlandi sem hafði fengið átta kíló af kókaíni í netin. Það gerðist 2017 þegar hann var að veiðum í Norðursjó. Úr netunum komu átta pokar með kókaíni.

Vestri Landsréttur dæmdi manninn nýlega í átta ára fangelsi vegna málsins. TV2 skýrir frá þessu. Dómurinn er aðeins vægari en tíðkast í málum sem þessum því maðurinn stóð ekki að innflutningi fíkniefnisins heldur komst yfir það fyrir tilviljun.

Lögreglan hefur ekki fundið kókaínið en maðurinn viðurkenndi að hafa fengið það í netin. Hann hélt því fram að hluti þess hefði verið blautt og ónýtt. Rannsókn lögreglunnar leiddi þó í ljós að hann hafði gefið vinum sínum tvö kíló og selt restina. Þegar hann var handtekinn fann lögreglan fimm haglabyssur, þar af fjórar afsagaðar, hjá honum, loftbyssu og 106 haglaskot. Lögreglan telur að maðurinn hafi útvegað sér vopnin eftir að hann fékk kókaínið í netin.