Eflaust dreymir suma um að fá bjór úr krönunum á heimilinu í staðinn fyrir vatn. En það er kannski ekki svo snjallt, að minnsta kosti ekki fyrir þá sem vilja fara í sturtu, þvo þvott og gera ýmislegt þar sem vatn kemur við sögu. En íbúar í fjölbýlishúsi einu í Kerala-ríki á Indlandi lentu nýlega í því að vatnið hvarf úr krönum þeirra og í staðinn fengu þeir bjór og sterkt áfengi úr þeim.

„Þegar við skrúfuðum frá krönunum kom brúnt vatn úr þeim.” Hefur CNN eftir Joshy Maliakkal sem býr í húsinu. Hann fór því til að kanna með vatnstank hússins og sá þá að olíukennt efni flaut á yfirborði hans og það lyktaði illa.

Í ljós kom að í tanknum var nú bjór og sterkt áfengi.

Ástæðan fyrir þessu fannst fljótlega en uppruni áfengisins var rakinn til hótels í nágrenninu. Starfsfólk þess hafði hellt 6.000 lítrum af áfengi niður í holu í jörðinni daginn áður. Áfengið rann niður í vatnsból í nágrenninu og þaðan í vatnstank fjölbýlishússins.

CNN hefur eftir embættismanni að áfengið hafi verið komið fram yfir síðasta söludag og hafi verið í geymslu síðan 2014. Ákveðið hafi verið að hella því niður en því miður hafi það farið í vatnsbólið og þaðan í vatnstank fjölbýlishússins.