Sadie Totterdell var handtekin á lestarstöð í Plymouth á Englandi á laugardaginn. Grunur leikur á að það hafi verið hundurinn hennar sem beit Frankie MacRitchie, níu ára dreng, til dauða.
Hundurinn sem um ræðir er bolabítur en hann réðst á Frankie sem var einungis 9 ára gamall.
Sadie Totterdell var fjölskylduvinur MacRitchie-fjölskyldunnar en þau voru öll í fríi á sama sumarhúsasvæðinu. Talið er að árásin hafi farið fram þegar Frankie var skilinn einn eftir með hundinum á meðan Sadie og móðir Frankie fóru í nærliggjandi sumarhús að fá sér drykki.
Athugavert þykir að drengurinn hafi verið skilinn einn eftir með hundinum þar sem hundurinn hafði áður ráðist á fólk og gengur yfirleitt með múl á sér.
Um klukkutíma eftir að árásin átti sér stað sást til Sadie á lestarstöð þar sem hún gekk um með blóðugum bolabít.
