Eftir hvarf Anne-Elisabeth Hagen, eiginkonu norska milljarðamæringsins Tom Hagen, í lok október á síðasta ári hafa svikahrappar plagað lögregluna og fjölskyldu hennar. Anne-Elisabeth var rænt af heimili sínu í útjaðri Osló og síðan hefur ekkert heyrst frá henni og ekki er vitað hvort hún er lífs eða liðin.

Svikahrappar hafa reynt að fá lausnargjald greitt allt frá því að málið komst í hámæli í janúar. Þá kom fram að mannræningjarnir hefðu krafist 9 milljóna evra í lausnargjald og á að greiða það í rafmynt.

VG segir að til dæmis hafi svikahrappar sent tölvupóst, úr dulkóðuðu netfangi, til netmiðilsins Medier24 fyrir um hálfum mánuði. Í póstinu nefna þeir Hagen-fjölskylduna, lögmann hennar og Tommy Brøske sem stýrir rannsókn lögreglunnar. Því næst segja þeir að þeir muni sanna að Anne-Elisabeth sé á lífi með því að senda myndband af henni en fyrst verði að greiða þeim sem nemur um 18 milljónum íslenskra króna í rafmynt.

Pósturinn er á ensku og undirritaður með búlgörsku nafni. VG segir að sami sendandi hafi áður reynt að komast í samband við Hagen-fjölskylduna.

Lögreglan segir að fleiri svikahrappar hafi látið að sér kveða að undanförnu með álíka hætti.