Almenningssamgöngur í borginni hafa verið stöðvaðar og þrjár sjúkraþyrlur hafa verið sendar á vettvang. VG segir að umfangsmiklar lögregluaðgerðir standi nú yfir í borginni.
BBC segir að maður hafi skotið á farþega í sporvagni og séu margir særðir.
Í Twitterfærslu frá yfirvöldum kemur fram að maður hafi dregið upp byssu og skotið á nærstadda. Ekki er upplýst um alvarleika meiðsla en tekið fram að margir fái aðhlynningu á vettvangi.
Sky segir að árásarmaðurinn hafi flúið af vettvangi og staðfestir hollenska lögreglan það við þarlenda fjölmiðla. Ekki er vitað hver hann er eða hvaða ástæður liggja að baki ódæðinu.
ALgemeen Dagblad segir að samkvæmt frásögnum vitna sé ekki útilokað að fleiri en einn hafi verið að verki.
Hollenska lögreglan segir að hryðjuverkadeild hennar hafi verið send á vettvang sem bendir til að ekki sé talið útilokað að um hryðjuverk sé að ræða.
Uppfært klukkan 11.15
Fjöldi fólks var skotinn í sporvagni í miðborg Utrecht klukkan 10.45 í morgun. Hollenskri fjölmiðlar segja að tveir árásarmenn gangi lausir í borginni og leitar fjölmennt lögreglulið þeirra.
Margir eru sagðir særðir en skotið var á fólk af handahófi í sporvagninum og utan hans.
Hollenska dagblaðið AD segir að margir hafi verið skotnir en ekki liggja fyrir upplýsingar um ástand þeirra. Hlúð er að særðum á vettvangi og verið er að flytja fólk á sjúkrahús. Þrjár læknaþyrlur voru sendar á vettvang auk fjölda sjúkrabíla.
Vegir í borginni eru lokaðir fyrir almennri umferð til að neyðarbílar komist hratt leiðar sinnar. Lögreglan segir ekki enn ljóst hversu margir voru skotnir.
