Hópur nýsjálenskra vísindamanna hefur að undanförnu leitað að vísbendingum um tilvist hins margumtalaða Loch Ness skrímslis, Nessie, í samnefndu vatni í Skotlandi. Þeir segjast hafa gert óvænta uppgötvun, eitthvað sem þeir áttu ekki von á.

Þetta segir Neil Gemmell, prófessor við Otago háskólann á Nýja-Sjálandi, sem hefur stýrt rannsókninni. Vísindamennirnir hafa rannsakað mörg hundruð sýni úr vatninu, tekin á mismunandi dýpi en það er allt að 220 metrar á dýpt. Samkvæmt frétt news.com.au vonuðust vísindamennirnir til að finna dna úr skrímslinu í þessum sýnum.

Þeir hafa einnig safnað lífsýnum úr öðrum hlutum eins og fjöðrum, feldi og skít. Allt hefur þetta verið sent til greininga og rannsókna á Nýja-Sjálandi, Ástralíu, Danmörku og Frakklandi.

En Gemmell vill ekki enn upplýsa hvað það er sem vísindamennirnir hafa uppgötvað en ætlar að skýra frá því á fréttamannafundi í Skotlandi síðar í mánuðinum. Þar mun hann að sögn leggja fram sannanir en fyrir hverju vill hann ekki segja enn sem komið er.

The Scotsman hefur eftir honum að vísindamennirnir hafi látið reyna á mikilvægustu kenningarnar um skrímslið. Þrjár þeirra séu að öllum líkindum byggðar á sandi en ein geti verið rétt.