Það gæti farið svo að fljótlega geti fólk ekki leyft öðrum að nota aðgang sinn að Netflix og öðrum efnisveitum. Þær hafa fram að þessu ekki gert mikið hvað varðar slíka misnotkun en þegar upp er staðið kostar þetta þær töluvert því þær verða af áfskriftum. Með nýrri tækni geta efnisveiturnar nú tekist á við þetta.

Samkvæmt frétt tímaritsins Variety hefur breska fyrirtækið Synamedia kynnt til sögunnar tækni til að fylgjast með þessu. Gervigreind mun vakta áskriftirnar og greina mynstur í notkun þeirra, til dæmis hvort verið sé að nota áskriftina á mismunandi stöðum í landinu, hvort óeðlilega miklu efni sé streymt eða hvort annað mynstur í notkuninni sýni að það séu margir að nota sama aðganginn.