Elenora Rós Georgsdóttir bakari og bolluaðdáandi á heiðurinn af helgarmatseðlinum að þessu sinni og mælir með því að við þjófstörtum bolludeginum í dag.
Bolludagur er eins og þjóðhátíðardagur bakarans og Elenora segir hann vera í miklu uppáhaldi. „Frá því ég var lítil hefur þetta alltaf verið uppáhalds dagurinn minn á árinu. Þegar ég var barn var venjan að vera með bollukaffi og þá var þessi klassíska í uppáhaldi eða með Royal karamellubúðing. Síðan voru fiskibollur eða kjötbollur í matinn á bolludaginn sjálfan.
„Ég mæli með að fólk prufi eitthvað nýtt og spennandi fyrir þennan ótrúlega skemmtilega dag og eigi góða stund með fólkinu sínu.“ Elenora deildi með lesendum Fréttablaðsins uppskriftum af nokkrum sínum uppáhalds bollum og bryddaði upp á í þættinum Matur og heimili í fyrra. Hér eru á ferðinni fjórar mismunandi sælkera fyllingar sem auðvelt er að gera og gleðja alla bolluunnendur.
Vatnsdeigsbollur
150 ml mjólk
150 ml vatn
250 g smjör við stofuhita
8 g sykur
4 g salt
230 g kökuhveiti
7 egg
Bragðlítil olía til steikingar
Byrjið á því að blanda saman fyrstu fimm hráefnunum í pott og hitið að suðu. Um leið og þetta byrjar að sjóða bætið þið hveitinu saman við og ristið massan með því að hræra vel og hratt allan tímann. Massinn er tilbúin þegar hann byrjar að losna frá hliðunum og er komin saman. Þegar massinn er tilbúinn er hann settur í hrærivélaskál og hrærður hratt til að ná mestum hita úr deiginu. Þegar deigið er búið að hrærast í smá tíma og er orðið volgt má byrja að bæta einu eggi við í einu, passið að hræra vel á milli og skafa öðru hvoru niður hliðarnar. Deigið er nú tilbúið og á að vera silkimjúkt og renna fallega en rólega niður. Setjið deigið í sprautupoka og sprautið bollur á bökunarpappírsklædda plötu. Hitið ofninn upp í 180°C. Bakið bollurnar í um það bil 20 mínútur eða þar til þær eru gullinbrúnar og búnar að lyfta sér vel.
Lakkrísdraumur
Nóg fyrir u.þ.b. 20 bollur
1 poki Pipar Nóa Kropp
1 pakki Eitt sett Royal Búðingur
1 dolla Dracula duft
Flórsykur
500 ml þeyttur rjómi
Búið til Royal búðinginn samkvæmt leiðbeiningum. Skerið bollurnar í tvennt. Setjið Eitt Sett búðing á bollurnar. Setjið nokkar Nóa Kropp kúlur á bollurnar og setjið síðan rjómann á og lokið bollunni. Blandið smá flórsykri og Dracula dufti saman og sigtið yfir bollurnar.
Karamelluubomba
Nóg fyrir u.þ.b. 20 bollur
500 ml þeyttur rjómi
Royal saltkaramellubúðingur
Daimkurl
100 g flórsykur (eða fínmalaður hrásykur)
20 g kakó
20-30 ml vatn
Búið til Royal búðing samkvæmt leiðbeiningum. Skerið bollurnar í tvennt. Setjið karamellubúðing, Daimkurl og þeyttan rjóma á bolluna og lokið bollunni. Blandið saman flórsykri, kakói og vatni og búið til glassúr. Smyrjið glassúr á lokið.
Bragðarefurinn
Nóg fyrir u.þ.b 20 bollur
1 pakki kókosbollur
1 pakki jarðarber
Nutella
500 ml þeyttur rjómi
Blandið saman þeyttum rjóma og kókosbollum. Skerið bollurnar í tvennt. Skerið niður jarðarberin. Setjið kókosbollurjóma og jarðaber á bolluna og lokið. Smyrjið Nutella á lokið á bollunni.
Sú Klassíska
Nóg fyrir u.þ.b 20 bollur
1 pakki jarðarber
Sulta að eigin vali
500 ml þeyttur rjómi
100 g flórsykur (eða fínmalaður hrásykur)
20 g kakó
20-30 ml vatn
Skerið niður jarðarberin í litla bita eða sneiðar. Skerið bollurnar í tvennt. Setjið sultu í botninn á bollunni. Setjið síðan rjóma á bolluna og raðið jarðarberjum á rjómann. Búið til glassúr með því að blanda saman vatni, flórsykri og kakói. Lokið bollunni og smyrjið glassúr á lokin á bollunum.
*Allt hráefnið fæst í versluninni Bónus.
