Eins og fram kemur á vef Fréttablaðsins í gær verður mikið um dýrðir í dag, laugardag, á veitingastaðnum Moss í Bláa Lóninu en þá mun Thibault Jacquet, yfirvínframleiðandi hinnar virtu vínekru, Domaine Bonneau du Martray í Côte de Beaune vínræktarhéraðinu í Búrgúnd í Frakklandi taka á móti gestum. Moss veitingastaður Retreat hótelsins í Bláa Lóninu og er þekktur fyrir metnaðarfullan matargerð og þjónustu. Thibault sem er þekktur á sínu sviði mun kynna vínpörun með sex árstíðabundnum réttum sem Agnar Sverrisson yfirmatreiðslumaður og matreiðsluteymi Moss munu elda fyrir gesti. Hver réttur verður paraður á faglegan hátt við einstaka vínárganga en vínekran er þúsund ára gömul og er sú eina í Búrgúnd héraðinu sem framleiðir eingöngu vín frá Grand cru vínekrum. Í dag er vínekran í eigu Bandaríkjamannsins Stanley Kroenke, sem einnig á Screaming Eagle víngerðina í Napa-dal í Kaliforníu. Hér er um einstakan viðburð að ræða og háklassa vínpörun með matseðlinum.
Síðan Agnar tók við sem yfirmatreiðslumaður á Moss árið 2020 hafa margir þekktir Michelin-stjörnu kokkar og vínþjónar komið til landsins og unnið með honum á veitingastaðnum. Á síðasta ári komu Michelin-stjörnu kokkarnir Raymond Blanc yfirmatreiðslumeistari Le Manoir aux Quat’Saisons og Ollie Dabbous, yfirmatreiðslumaður veitingastaðarins Hide í London.
„Við höldum áfram að fá til okkar þekkta matreiðslumeistara, vínframleiðendur og þjóna. Við leggjum mikinn metnað í að fá þessa meistara til landsins og við hlökkum mikið til að taka á móti Thibault Jacquet, framkvæmdastjóra Domaine Bonneau du Martray”, segir Agnar. „Thibault ætlar að fara með okkur í gegnum þá miklu sögu sem býr í vínekrunum sem hann stýrir og kynna fyrir okkur rauðvínin, Corton, og hvítvínin, Corton Charlemagne Grand Cru. Á viðburðinum verða nokkur ótrúlega mögnuð vín borin fram og það hefur verið sönn ánægja að setja saman einstakan sex rétta matseðil til að fá sem besta samspil matar og vínsins sem í boði er að þessu sinni frá vínekrunni.”
Agnar lærði hjá hinum fræga matreiðslumeistara Raymond Blanc á Le Manoir aux Quat’Saisons í Bretlandi. Hann stofnaði síðar veitingastaðinn Texture í London sem fékk Michelin-stjörnu árið 2010 og hélt henni í 10 ár þangað til hann lokaði staðnum og flutti aftur heim á ný.
