Linda Péturdóttir átti heiðurinn af vikumatseðli Fréttablaðsins í síðustu viku sem er hreint út sagt ómótstæðilegur og stuðlar að hollum og heilsusamlegum lífsstíl. Hún setti saman nokkrar af sínum uppáhalds uppskriftum og meðal annars af þessum dásamlega græna drykk, sem kallast einfaldlega Lindu drykkurinn.

„Ég er mjög skipulögð og vinn fram í tímann en ég geri alltaf ráð fyrir tíma í hádeginu til að fá mér holla næringu. Flest hádegi fæ ég mér einn heilsudrykk úr 28 daga Heilsuáskoruninni minni, þeir eru bragðgóðir og saðsamir og ég veit að ég er að fá alla þá næringu sem ég þarf á að halda, þetta hef ég gert nánast daglega í nokkur ár. Og þeir taka stuttan tíma að útbúa sem er mikill plús fyrir annasamt fólk. „Lindudrykkurinn“ svokallaði (fékk á sig þetta nafn í Baðhúsinu þar sem þetta var uppáhalds heilsudrykkurinn minn þá) er gífurlega næringarþéttur og góður kostur í upphafi viku og þegar mikið er að gera.“

Hér er hin fullkomna uppskrift af góðum drykk sem gott er að hefja alla daga á.

Lindudrykkurinn

1 lúka spínat

1 avókadó

1/3 agúrka

½ greipaldin eða 1 grænt epli

1 sentimetri engifer

safi úr einni sítrónu

1 msk. mulin hörfræ

Klakar eða ískalt vatn eftir smekk.

Allt sett í blandara og þeytt saman þangað til drykkurinn er orðinn silkimjúkur.

„Til þess að vera viss um að ég fá nægt prótín borða ég líka eitt eða jafnvel tvö harðsoðinn egg með. Annars veit ég að ég fæ gott magn af andoxunarefnum úr grænmetinu, og góða holla fitu sem heldur mér lengi saddri úr avókadóinu og úr hörfræjunum. Og svo er hann líka svo góður á bragðið.“