Hér er á ferðinni undursamlegt og sumarlegt salat með grilluðum humri sem þið eigið eftir að elska. Berglind Hreiðars okkar sem heldur úti síðunni Gotterí og gersemar á heiðurinn af þessu sumarlega salat.

„Við grilluðum þetta salat í hádeginu einn daginn og það kláraðist upp til agna og við munum klárlega útbúa það aftur á næstunni,“ segir Berglind og bætir við að fátt toppi það að fá humar á góðum sumardegi.

Humarsalat

Fyrir 4-5

Grillaður humar

Um 660 g skelflettur humar frá Sælkerafiski (2 pk)

1/3 sítróna (safinn)

2 msk. ólífuolía

2 hvítlauksrif (rifin)

½ tsk. salt

½ tsk. hvítlauksduft

¼ tsk. pipar

Skolið og þerrið humarinn vel. Blandið öllu öðru saman í skál og leyfið humrinum síðan að marínerast í leginum í að minnsta kosti 3 klukkustundir eða yfir nótt. Raðið humri þétt upp á grillspjót og grillið á heitu grilli í um 2 mínútur á hvorri hlið eða þar til humarinn er eldaður í gegn. Gott er að spreyja PAM matarolíuspreyi á grindina áður en þið leggið humarspjótin niður. Raðið humarspjótunum ofan á salatið og njótið með ísköldu hvítvíni. Einnig mætti rista hvítlauksbrauð með þessum rétti.

Salat og dressing

1 poki klettasalat

½ þroskað mangó

6 stk. jarðarber

Fetaostur eftir smekk

Ristaðar furuhnetur eftir smekk

Heinz hvítlausdressing á flösku

Skerið niður mangó og jarðarber. Raðið öllu saman í skál og leggið humarspjótin yfir. Sprautið hvítlauksdressingu yfir allt.

Njótið vel.