Grillaðir eftirréttir eru hrein dásemd fyrir bragðlaukana og eiga vel við á sumrin. Berglind okkar Hreiðars köku- og matarbloggari með meiru sem heldur úti síðunni Gotterí og gersemar er hér með eina hugmynd sem steinliggur. Berglind lofar að koma með fleiri hugmyndir og uppskriftir af grilluðum eftirréttum á næstunni.
„Þessir ávextir voru dásamlegir með nýbræddu súkkulaði og síðan hugsa ég að þeir færu einnig mjög vel með ís eða rjóma,“ segir Berglind og nýtur þess að töfra fram rétti með bræddu súkkulaði. Svo mælir Berglind með rósavíni með grilluðu ávöxtunum.
Grilluð ávaxtaspjót með súkkulaði
5-6 spjót
½ ferskur ananas
3 ferskjur
15-20 Driscolls jarðarber
50 g brætt dökkt súkkulaði
2 msk. söxuð mynta
Skerið ananas og ferskjur niður í hæfilega stóra bita. Raðið ananas, ferskjum og jarðarberjum til skiptis upp á grillspjót. Grillið á meðalheitu grilli í um 2 mínútur á hvorri hlið. Raðið á bakka og setjið brætt súkkulaði yfir allt og saxaða myntu.
