Oft hefur það ratað á síður blaðanna hve óhollt örbylgjupopp er, bæði vegna aukaefna í poppinu sjálfu og vegna skaðlegra efna í umbúðum. Hins vegar er hægt að poppa í örbylgjuofni án þess að vera með sérstakt örbylgjupopp.

Þessi aðferð er sögð fljótleg, þægileg og einnig er þetta ódýrara en að kaupa sérstakt örbylgjupopp. Það sem þarf til að poppa samkvæmt þessari aðferð er poppmaís, smjör (ekki smjörlíki), skál og diskur eða önnur skál. Þeir sem vilja geta síðan notað salt á poppið.

1. Poppmaís er hellt í skál sem má fara í örbylgjuofn.

2. Smjör er sett á annað ílát sem þolir að fara í örbylgjuofn, smekksatriði hversu mikið smjör er notað.

3. Ílátið með smjörinu er sett ofan á skálina með poppmaísnum. Það hindrar maísinn í að fara út um allan ofn.

4. Þetta er síðan sett í örbylgjuofni í 2:45 til 3 mínútur (fer eftir styrk ofnsins).

5. Þegar poppið er tilbúið er smjörinu hellt ofan á það (það er betra að nota ofnhanska þegar ílátin eru meðhöndluð).

6. Þá er bara að háma poppið í sig.

Svo eru margir sem telja poppkorn vera mjög hollt og ekki skemmir fyrir að það er gott. Þá hafa sumir gengið svo langt að segja að poppkorn sé ofurfæði.